Iurreta

San Miguel jaiak, irailaren 29an. Iurretako antzinako auzotarrak San Miguel bezperan hasten ziren festak ospatzen. Edozelan ere, hori baino lehenago herriko mutilak "Txonpolo" zuhaiztian batzen ziren, ospakizunik garrantzitsuenetarikoaren, "Dantzari Dantza"-ren entsaiuak hasteko. San Salvador osteko hurrengo domekan (hau da, abuztuaren 6tik aurrera) ekiten zieten entrenamendu saioei. "Banderariak" zortzi gazte aukeratzen zituen, eta behin aukeraketa eginda, danbolinjoleari deitu eta azken saiorako prestatzen ziren. Horren aurretik "Doniel Haretxa" altxatzen zuten plaza erdian, eta gero "Dantzari-Dantza" (bertoko euskeraz "Jantzari - Jantza") dantzatzen zuten, danbolinjolea aurrean kokatuz.

Jaiak, Durangoko Merinaldeko bertoko bederatzi dantza-motak izaten ditu ardatz: "Dantzari Dantza", Agientariena, Zortzinangue, Ezpata-txikiak, Banan-banangue, Biñangue, Ezpata-nagusiak, Launangue, Makil-jokue eta Txotxongillue, "Erregelak" deritzonarekin batera - Aurresku eta Atzesku.

Irailaren 29an, Meza Nagusiaren ostean eta Udalbatza buru dela egiten da "Dantzari-Dantza".

Arratsaldean berriro ere egiten da. Egun honetan bertan bestelako jai-ekintzak izaten dira, esate baterako ahari-borrokak, bertsolariak, erromeriak eta abar...

Urriko lehenengo domekan, Errosario egunean, jaiek aurrera jarraitzen dute. Azken urteotan egun horretan "Bizkaiko aintzinako musika tresna joleen eguna" ospatzen da ".

Auzoetan hamar ermita daude sakabanaturik, eta horietan ere, bakoitzaren santuei dagokion jaiak ospatzen dira.

Azken urteotan Iurretako kultur – eIkarteek jai-ekintzak antolatzen dituzte ihauterietan eta San Juan bezperan ere bai, bagilaren 23an, udako solstizio egunean.